டெஹ்ரான் / வாஷிங்டன் | மார்ச் 12, 2026 : மத்திய கிழக்கில் அமெரிக்க கூட்டுப்படை மற்றும் இஸ்ரேலிய போர் விமானங்களின் குண்டுமழைக்கு இடையே, 12-வது நாளை எட்டியுள்ள போர் இப்போது ஒரு மிக முக்கியமான ராஜதந்திரத் திருப்புமுனையை அடைந்துள்ளது. ஈரானை அடியோடு வீழ்த்திவிடலாம் என்று கணக்குப் போட்ட மேற்குலக நாடுகளுக்கு அதிர்ச்சியளிக்கும் வகையில், ஈரான் அதிபர் மசூத் பெசெஷ்கியன் (Masood Pezeshkian) போரை நிறுத்த மூன்று நிபந்தனைகளை விதித்துள்ளார்.
போர்க்களத்தில் ஈரான் காட்டிய ‘அடாவடி’ அமைதி!
அமெரிக்காவின் அதிநவீன ஏவுகணைகள் ஈரானின் முக்கிய நிலைகளைத் தாக்கிய போதிலும், ஈரானிய மக்கள் கிளர்ச்சி செய்யாதது இஸ்ரேலிய உளவு அமைப்பான ‘மொசாட்’டை (Mossad) திகைக்க வைத்துள்ளது. இந்தச் சூழலைப் பயன்படுத்திக் கொண்ட அதிபர் மசூத் பெசெஷ்கியன், தனது அதிகாரப்பூர்வ ‘X’ தளத்தில் உலக நாடுகளுக்கு ஒரு தெளிவான செய்தியை விடுத்துள்ளார்.
در تماس با روسای دولتهای روسیه و پاکستان ضمن اعلام التزام جمهوری اسلامی به صلح و آرامش در منطقه، تاکید کردم تنها راه پایان جنگی که با آتشافروزی رژیم صهیونیستی و آمریکا آغاز شده پذیرش حقوق مسلم ایران، پرداخت غرامت و الزام قاطع بینالمللی به عدم تجاوز مجدد آنان است. https://t.co/T48UzJf3M6
— Masoud Pezeshkian (@drpezeshkian) March 11, 2026
ஈரான் முன்வைக்கும் 3 நிபந்தனைகள்:
இறையாண்மை அங்கீகாரம்: ஈரானின் சட்டபூர்வமான உரிமைகளை (குறிப்பாக அணுசக்தி ஆய்வு மற்றும் பிராந்திய பாதுகாப்பு உரிமைகள்) அமெரிக்காவும், இஸ்ரேலும் நிபந்தனையின்றி அங்கீகரிக்க வேண்டும். ஈரானை ஒரு ‘ஆக்கிரமிப்பு நாடாக’ சித்தரிப்பதை நிறுத்த வேண்டும்.
சர்வதேசப் பாதுகாப்பு கியாரன்ட்டி: “இனி ஒருபோதும் ஈரான் மீது தாக்குதல் நடக்காது” என்பதற்கு ஐக்கிய நாடுகள் சபையின் பாதுகாப்பு கவுன்சில் (UNSC) மூலம் சர்வதேச சட்ட உத்தரவாதம் அளிக்கப்பட வேண்டும். ‘ஆட்சி மாற்ற’ (Regime Change) திட்டங்களை அமெரிக்கா கைவிட வேண்டும்.
பொருளாதார இழப்பீடு: கடந்த 12 நாட்களில் ஈரானின் எண்ணெய் கிணறுகள், துறைமுகங்கள் மற்றும் பொதுமக்களின் உள்கட்டமைப்புகளுக்கு ஏற்பட்ட பல பில்லியன் டாலர் சேதங்களுக்கு அமெரிக்காவும், இஸ்ரேலும் முறையான இழப்பீடு வழங்க வேண்டும்.
கடல்வழித் தாக்குதலும்.. இந்திய மாலுமியின் மரணமும்!
ஈரான் ஒருபுறம் அமைதி பேசினாலும், மறுபுறம் வளைகுடா கடற்பகுதியை ‘மரணக் கிணறாக’ மாற்றியுள்ளது. சர்வதேச ஊடகமான அல் ஜசீரா (Al Jazeera) வெளியிட்டுள்ள பிரத்யேகத் தகவலின்படி, ஈராக் கடல் பகுதியில் மால்டா மற்றும் மார்ஷல் தீவுகளின் கொடியுடன் சென்ற இரண்டு பிரம்மாண்ட எண்ணெய் கப்பல்கள் மீது ஈரானின் ‘புரட்சிகர காவல் படை’ (IRGC) தற்கொலை ட்ரோன்கள் மற்றும் நீருக்கடியில் இயங்கும் ஆளில்லா கருவிகள் (UUV) மூலம் தாக்குதல் நடத்தியுள்ளது.
இந்தத் தாக்குதலில் இந்திய மாலுமி ஒருவர் உடல் கருகி உயிரிழந்தார் என்ற செய்தி டெல்லியில் பெரும் அதிர்வலைகளை ஏற்படுத்தியுள்ளது. அமெரிக்க நிறுவனமான ‘கிரேக்க கம்பெனி’க்குச் சொந்தமான இந்தக் கப்பல்கள் எரிக்கப்பட்டதைத் தொடர்ந்து, ஈராக் தனது அனைத்து எண்ணெய் முனையங்களையும் (Oil Terminals) தற்காலிகமாக மூடியுள்ளது. இது சர்வதேச கச்சா எண்ணெய் விலையை மீண்டும் $135 டாலருக்கு மேல் ஏற்றியுள்ளது.
“துறைமுகங்களைத் தொட்டால் உலகுக்கே சாப்பாடு இல்லை” – ஈரானின் மிரட்டல்!
ஈரான் ஆயுதப்படையின் செய்தித் தொடர்பாளர் அபுல்ஃபசல் ஷெகர்ச்சி விடுத்துள்ள எச்சரிக்கை, பிபிசி (BBC) மற்றும் ராய்ட்டர்ஸ் தளங்களில் தலைப்புச் செய்தியாகியுள்ளது. “அமெரிக்கா எங்கள் துறைமுகங்களைத் தாக்கத் திட்டமிட்டால், பாரசீக வளைகுடாவில் இருக்கும் சவுதி, அமீரகம், குவைத் போன்ற நாடுகளின் ஒரு துறைமுகம் கூட தப்பாது. எக்கனாமிக் சென்டர்கள் அனைத்தும் எரியும்” என்று அவர் கொக்கரித்துள்ளார். இதன் மூலம் உலகளாவிய விநியோகச் சங்கிலியை (Global Supply Chain) சீர்குலைக்க ஈரான் தயாராகிவிட்டதை இது காட்டுகிறது.
அமெரிக்காவின் தர்மசங்கடம் – பிபிசி (BBC) அலசல்!
போரின் வேகம் குறையத் தொடங்கியுள்ளதாக பென்டகன் வட்டாரங்கள் தெரிவிக்கின்றன. “அமெரிக்கா முதலில்” (America First) என்ற கொள்கையைக் கொண்ட டொனால்ட் டிரம்ப், தேவையற்ற வெளிநாட்டுப் போர்களில் அமெரிக்கப் பணத்தைச் செலவிடுவதற்கு எதிராக நெருக்கடி அதிகரித்துள்ளது. 12 நாள் போரின் செலவு பல டிரில்லியன் டாலர்களைத் தொட்டுள்ளதாலும், உலகப் பொருளாதாரச் சரிவு ஏற்படும் அபாயம் உள்ளதாலும், போருக்கு எதிராக அமெரிக்க வீதிகளில் மக்கள் திரள்வதாலும், டிரம்ப் நிர்வாகம் எப்படியாவது போரை முடிவுக்குக் கொண்டு வர ரகசியப் பேச்சுவார்த்தைகளைத் தொடங்கியுள்ளதாகத் தெரிகிறது. ஆனால், இஸ்ரேல் பிரதமர் நெதன்யாகு, ஈரானின் அணுசக்தி மையங்களை அழிக்கும் வரை பின்வாங்கப் போவதில்லை என்று பிடிவாதமாக இருக்கிறார்.
நிபந்தனை ஏற்கப்படுமா?
ஈரானின் நிபந்தனைகளை அமெரிக்கா ஏற்குமா? அல்லது மத்திய கிழக்கு ஒரு முழுமையான உலகப் போரை நோக்கிச் செல்லுமா? என்பது அடுத்த 48 மணி நேரங்களில் தெரிந்துவிடும். ஆனால், இந்திய மாலுமி ஒருவரின் உயிர் பிரிந்திருப்பது இந்திய வெளியுறவுத் துறைக்கு ஒரு புதிய சவாலை ஏற்படுத்தியுள்ளது.
Subscribe to our channels on YouTube & Telegram & 
Tamilnadu & Pondicherry