4 Mins. Read : ஒட்டுமொத்த மனித குலத்தையே உறைய வைத்த புதுக்கோட்டை வேங்கைவயல் சம்பவம் நடைபெற்று இன்றுடன் (டிசம்பர் 26) மூன்று ஆண்டுகள் நிறைவடைகிறது. “யாரையும் பின்தங்க விடமாட்டோம்” என முழங்கும் திராவிட மாடல் ஆட்சியில், வேங்கைவயல் ஒரு தீராத வடுவாகத் தொடரும் நிலையில், கடந்த 4 ஆண்டுகளில் பட்டியலின மக்கள் மீது நடத்தப்பட்ட தாக்குதல்களின் பட்டியல் நீண்டு கொண்டே செல்வது அதிர்ச்சியை அளிக்கிறது.
அவலத்தின் தொடக்கம்: வேங்கைவயல் (2022 – தற்போது வரை)
கடந்த 2022-ம் ஆண்டு டிசம்பர் 26-ம் தேதி, புதுக்கோட்டை மாவட்டம் முத்துக்காடு ஊராட்சிக்கு உட்பட்ட வேங்கைவயல் கிராமத்தில் வசிக்கும் பட்டியலின மக்கள், தங்கள் பகுதி மேல்நிலை நீர்த்தேக்கத் தொட்டியில் இருந்து வந்த குடிநீர் நிறம் மாறி, துர்நாற்றம் வீசுவதைக் கண்டு அதிர்ச்சியடைந்தனர். சோதித்துப் பார்த்தபோது, அத்தண்ணீரில் மனிதக் கழிவு கலக்கப்பட்டிருந்தது கண்டுபிடிக்கப்பட்டது. குழந்தைகள், பெரியவர்கள் எனப் பலர் மருத்துவமனையில் அனுமதிக்கப்பட்டனர். மனிதநேயம் மரணித்த இந்தச் சம்பவம் உலக அளவில் செய்தியானது.
விசாரணையும் இழுபறியும்: 720 நாட்கள் நடந்தது என்ன?
முதலில் வெள்ளனூர் காவல்துறையினர் 5 பிரிவுகளின் கீழ் வழக்குப்பதிவு செய்தனர். ஆனால், விசாரணை திருப்திகரமாக இல்லை என்ற குற்றச்சாட்டு எழுந்ததால், வழக்கு சிபிசிஐடி (CB-CID) வசமானது.
* பிரம்மாண்ட விசாரணை: சுமார் 330 நபர்களிடம் விசாரணை நடத்தப்பட்டது.
* அறிவியல் சோதனைகள்: சந்தேகத்தின் அடிப்படையில் 31 பேருக்கு டி.என்.ஏ (DNA) பரிசோதனையும், ஒரு காவலர் உட்பட 5 பேருக்கு குரல் மாதிரி பரிசோதனையும் செய்யப்பட்டது.
* ஆணையங்கள்: ஓய்வு பெற்ற நீதிபதி சத்யநாராயணன் தலைமையில் தனிநபர் ஆணையம் அமைக்கப்பட்டு விசாரணை அறிக்கைகள் நீதிமன்றத்தில் சமர்ப்பிக்கப்பட்டன.
சிபிசிஐடியின் அதிரடி குற்றப்பத்திரிக்கை: பாதிக்கப்பட்டவர்களே குற்றவாளிகளா?
720 நாட்கள் நடந்த இழுபறிக்குப் பின், கடந்த ஜனவரி 2024-ல் சிபிசிஐடி தாக்கல் செய்த குற்றப்பத்திரிக்கை அதிர்ச்சியை ஏற்படுத்தியது. அந்தத் தொட்டியில் மனிதக் கழிவை கலந்தது அதே கிராமத்தைச் சேர்ந்த முரளிராஜா, முத்துகிருஷ்ணன், சுதர்சன் ஆகிய மூன்று பட்டியலின இளைஞர்கள்தான் என போலீசார் குற்றம்சாட்டினர்.
பாதிக்கப்பட்ட மக்களையே குற்றவாளிகளாகச் சித்தரிப்பதாக ஊர் மக்கள் கொதித்துப் போயுள்ளனர். “நாங்கள் பாதிக்கப்பட்டவர்கள், எங்களை ஏன் சிபிசிஐடி வேட்டையாடுகிறது?” என்பது அவர்களின் ஆதங்கம். இந்த மூவரையும் விடுவிக்கக் கோரிய மனுக்கள் தற்போது புதுக்கோட்டை நீதிமன்றத்தில் விசாரணையில் உள்ளன.
ஸ்டாலின் ஆட்சியில் பட்டியலின மக்கள் மீதான தாக்குதல்கள்: ஒரு பார்வை
வேங்கைவயல் ஒரு உதாரணம் மட்டுமே. 2021-க்குப் பிறகு தமிழகத்தின் பல்வேறு இடங்களில் நடந்த சம்பவங்களில் சிலவற்றை மட்டும் பார்ப்போம்:
1. பெருந்துறை பள்ளிச் சம்பவம் (2022): ஈரோடு மாவட்டம் பெருந்துறையில் உள்ள அரசுப் பள்ளியில், 6 பட்டியலின மாணவர்களைக் கொண்டு கழிவறையைச் சுத்தம் செய்யச் சொன்ன தலைமையாசிரியை இடைநீக்கம் செய்யப்பட்டார். சமூக நீதி பேசும் மாநிலத்தில் அரசுப் பள்ளியிலேயே நடந்த இந்த தீண்டாமைச் சம்பவம் பெரும் சர்ச்சையை ஏற்படுத்தியது.
2. தென்காசி ‘பள்ளி மாணவர்களுக்கு மிட்டாய் மறுப்பு’ (2022): தென்காசி மாவட்டம் பாஞ்சாகுளம் கிராமத்தில், பட்டியலினக் குழந்தைகளுக்குப் பெட்டிக்கடையில் மிட்டாய் வழங்க மறுக்கப்பட்ட வீடியோ வைரலானது. “ஊர் கட்டுப்பாடு” என்ற பெயரில் நடந்த இந்தத் தீண்டாமைச் சம்பவம் தமிழகத்தின் ‘சமூக நீதி’ முகமூடியைக் கிழிப்பதாக அமைந்தது.
3. நாங்குநேரி சம்பவம் (2023): திருநெல்வேலி மாவட்டம் நாங்குநேரியில், பள்ளி மாணவன் ஒருவனும் அவனது தங்கையும் சக மாணவர்களால் வீடு புகுந்து அரிவாளால் வெட்டப்பட்ட சம்பவம் ஒட்டுமொத்த தமிழகத்தையே அதிர வைத்தது. ஜாதி வெறியால் விளைந்த இந்தத் தாக்குதல், பள்ளிகளிலேயே ஜாதி வேர் ஊன்றியிருப்பதை அம்பலப்படுத்தியது.
4. சத்துமூர் ஜாதி வன்கொடுமை (2023): அம்பேத்கரின் உருவத்தை டாட்டூ குத்தியிருந்ததற்காக ஒரு தலித் இளைஞர் கடுமையாகத் தாக்கப்பட்ட சம்பவம் அரங்கேறியது.
5. பெரம்பலூர் ‘தலித் ஊராட்சித் தலைவர்’ அவமதிப்பு (2023): பெரம்பலூர் மாவட்டம் ஒரு கிராமத்தில் பட்டியலினத்தைச் சேர்ந்த பெண் ஊராட்சித் தலைவர், ஜாதி ரீதியான பாகுபாட்டினால் நாற்காலியில் அமர அனுமதிக்கப்படாமல் தரையில் அமர வைக்கப்பட்ட புகைப்படம் வெளியாகி அரசுக்கு நெருக்கடியை ஏற்படுத்தியது.
6. மதுரை வேளான்பூர் ஆணவக் கொலை (ஜூன் 2024): விருதுநகர் மாவட்டத்தைச் சேர்ந்த அழகேந்திரன் என்ற தலித் இளைஞர், மாற்றுச் சமூகப் பெண்ணைக் காதலித்ததற்காக மதுரையில் தலை துண்டிக்கப்பட்ட நிலையில் சடலமாகக் கண்டெடுக்கப்பட்டார். காதல் திருமணத்தை எதிர்த்த பெண்ணின் சகோதரர் இந்தப் படுகொலையைச் செய்ததாகக் குற்றம் சாட்டப்பட்டு கைது செய்யப்பட்டார்.
7. நாங்குநேரி மாணவன் மீது மீண்டும் தாக்குதல் (2025): சிகிச்சைக்குப் பின் மீண்டு வந்த அதே மாணவன் மீது மீண்டும் மர்ம நபர்கள் தாக்குதல் நடத்தியிருப்பது, அரசு கொடுத்த பாதுகாப்பின் லட்சணத்தைக் காட்டுகிறது.
8. விழுப்புரம் நகராட்சி அதிகாரி அவமதிப்பு (2025): விழுப்புரத்தில் ஒரு தலித் நகராட்சி அதிகாரியை, திமுக கவுன்சிலர் ஒருவர் காலில் விழுந்து வணங்கச் சொல்லி ஜாதி ரீதியாக இழிவுபடுத்திய வீடியோ சமூக வலைதளங்களில் வெளியாகிப் பெரும் பரப்பரப்பை ஏற்படுத்தியது.
9. பரந்தூர் போராட்டம்: விமான நிலையத் திட்டத்திற்காக நிலம் கையகப்படுத்தும் விவகாரத்தில், அங்குள்ள பட்டியலின விவசாயிகளின் வாழ்வாதாரம் கேள்விக்குறியாகி 1000 நாட்களைக் கடந்து போராட்டம் நீடித்து வருகிறது.
10. கவின் ஆணவப் படுகொலை (ஜூலை 2025): தூத்துக்குடி மாவட்டம் ஆறுமுகமங்கலத்தைச் சேர்ந்த மென்பொறியாளர் கவின் (27). இவர் மாற்றுச் சமூகத்தைச் சேர்ந்த பெண்ணைக் காதலித்ததற்காக, நெல்லை மாவட்டம் பாளையங்கோட்டையில் வைத்துப் பட்டப்பகலில் வெட்டிப் படுகொலை செய்யப்பட்டார். பெண்ணின் சகோதரர் (காவல் துறையினரின் மகன்) இந்த கொலையைச் செய்திருப்பது அதிர்ச்சியை ஏற்படுத்தியது. இச்சம்பவம் குறித்து முதலமைச்சர் மு.க. ஸ்டாலின் உத்தரவின் பேரில் வழக்கு சிபிசிஐடி (CB-CID) விசாரணைக்கு மாற்றப்பட்டது.
குறைந்த தண்டனை விகிதம் (Conviction Rate): சமீபத்திய அறிக்கைகளின்படி, தமிழகத்தில் பட்டியலின மக்களுக்கு எதிரான குற்றங்களில் தண்டனை விகிதம் வெறும் 12.2% ஆக மட்டுமே உள்ளது. இது தேசிய சராசரியான 31.9%-ஐ விட மிகவும் குறைவு.
2026 தேர்தலில் இது திமுகவிற்கு எந்த மாதிரியான தாக்கத்தை ஏற்படுத்தும்?
வேங்கைவயல் மற்றும் அதனைத் தொடர்ந்து நடந்த இந்தச் சம்பவங்கள் வரும் சட்டமன்றத் தேர்தலில் திமுகவிற்குப் பெரும் பின்னடைவை ஏற்படுத்தும் என அரசியல் நோக்கர்கள் கருதுகின்றனர்:
* தலித் வாக்குகளில் சரிவு: திமுகவின் பாரம்பரிய வாக்கு வங்கியாகக் கருதப்படும் பட்டியலின மக்கள் மத்தியில், “ஆட்சியில் இருந்தாலும் தலித்களுக்குப் பாதுகாப்பு இல்லை” என்ற எண்ணம் வலுப்பெற்றுள்ளது.
* கூட்டணி விரிசல்: திமுகவின் கூட்டணிக் கட்சியான விசிக (VCK), “தமிழகத்தில் தலித்கள் அரசியல் ரீதியாகப் பலவீனப்படுத்தப்படுகிறார்கள்” என விமர்சிக்கத் தொடங்கியுள்ளது. ஆனாலும் அவர்கள் கையறு நிலையிலேயே உள்ளனர். திமுக சொல்வதை மட்டும் கேட்கும் நிலைக்கு விசிக-வினர் தள்ளப்பட்டுவிட்டனர். இருந்தாலும் கொஞ்சம் தைரியத்தை வரவழைத்துக்கொண்டு அல்லது திமுகவிடம் அனுமதி வாங்கிக்கொண்டு திமுக கூட்டணி தலைவர்கள் முன்வைத்த கருத்துகள் இவைதான்.
தொல். திருமாவளவன் (விசிக): “வேங்கைவயல் விவகாரத்தில் சிபிசிஐடி தாக்கல் செய்துள்ள அறிக்கை ஏமாற்றம் அளிக்கிறது. பாதிக்கப்பட்ட பட்டியலின மக்களையே குற்றவாளிகளாகச் சித்தரிப்பது வன்மையான கண்டனத்திற்குரியது. இந்த வழக்கை உடனடியாக சிபிஐ (CBI) விசாரணைக்கு மாற்ற வேண்டும்” எனத் தனது அதிருப்தியைத் தொடர்ந்து பதிவு செய்து வருகிறார்.
பெ. சண்முகம் (மார்க்சிஸ்ட் கம்யூனிஸ்ட்): “சிபிசிஐடி தாக்கல் செய்துள்ள குற்றப்பத்திரிகையை விசாரணை நீதிமன்றம் ஏற்கக் கூடாது. உண்மைக் குற்றவாளிகளைக் காப்பாற்றுவதற்காகவே இந்த நாடகம் ஆடப்படுகிறது. திமுக அரசு இதில் மெத்தனமாக இருக்கிறது” என நேரடியாகவே குற்றம் சாட்டியுள்ளார்.
நிர்வாகத் தோல்வி: “சமூக நீதி பேசும் ஸ்டாலின் ஆட்சியில், “சமூக நீதி பேசும் ஸ்டாலின் ஆட்சியில் தலித் மக்களுக்குக் குடிநீரில் மலம்!” என்ற ஒற்றை முழக்கம், தேர்தல் களத்தில் திமுகவிற்குப் பெரும் சவாலாக அமையும்.
சமீபத்தில் நடந்த மாவட்டச் செயலாளர்கள் கூட்டத்தில் முதலமைச்சர் மு.க. ஸ்டாலின் அவர்கள், “கூட்டணிக் கட்சியினரின் விமர்சனங்களுக்குப் பதில் சொல்லிப் பிரச்சினையை வளர்க்க வேண்டாம்; 2026-ல் மீண்டும் ஆட்சியைப் பிடிக்கவே உழையுங்கள்” என அறிவுறுத்தியுள்ளார். இது, கூட்டணிக் கட்சிகளுக்குள் இருக்கும் விரிசலை திமுக தலைமை உணர்ந்திருப்பதையே காட்டுகிறது.
முடிவுரை
வேங்கைவயல் மக்கள் இன்னும் இயல்பு நிலைக்குத் திரும்பவில்லை. கிராமத்தில் சோதனைச் சாவடிகளும், போலீசாரும் குறைந்திருந்தாலும், மனதளவில் அவர்களுக்கு ஏற்பட்டுள்ள வடு இன்னும் ஆறவில்லை. 2026 சட்டமன்றத் தேர்தல் களத்தில், “வேங்கைவயல் நீதி” என்பது வெறும் கோரிக்கையாக மட்டுமல்லாமல், ஆளுங்கட்சிக்கு எதிரான ஒரு வலிமையான அரசியல் ஆயுதமாக மாறும் என்பதில் சந்தேகமில்லை.
ஒரு பக்கம் “திராவிட மாடல்” என்று கூறிக்கொண்டு, மறுபக்கம் தன் கூட்டணிக் கட்சிகளாலேயே “பட்டியலின மக்களுக்குத் துரோகம் செய்கிறது” என விமர்சிக்கப்படும் இந்த முரண்பாடு, 2026 தேர்தலில் திமுகவிற்குப் பெரும் பலவீனமாக மாற வாய்ப்புள்ளது.
மக்கள் வரிப்பணத்தை கொட்டி நிர்வாகத் தோல்வியை மறைக்கும் விளம்பரங்கள் வேண்டாம்… நீதி வேண்டும்! பாதிக்கப்பட்ட மக்களுக்காக வேல்ஸ் மீடியா தொடர்ந்து குரல் கொடுக்கும்!
Subscribe to our channels on YouTube & Telegram & 
Tamilnadu & Pondicherry