ஆரோக்கிய ரகசியம்: சௌனாவா? வெந்நீர்த் தொட்டியா? – உடலியல் ஆய்வின் அதிர்ச்சி தகவல்!

ஒரு கடுமையான வேலை நாளின் முடிவில், அல்லது தீவிர உடற்பயிற்சிக்குப் பிறகு, வெந்நீரில் மூழ்குவது, அல்லது சௌனாவில் அமர்வது – இரண்டும் மனதிற்கும் உடலுக்கும் ஆறுதல் தரும் அனுபவம். ஆனால், இந்த இரண்டு வெப்ப சிகிச்சைகளில் எது உங்கள் உடலுக்கு உண்மையில் அதிக நன்மை தருகிறது? என்ற கேள்விக்கு சமீபத்திய உடலியல் ஆய்வு புதிய பதிலை அளிக்கிறது.

வெந்நீர்த் தொட்டிகள் Vs சௌனாக்கள்: அறிவியல் பார்வை

ஒரேகான் பல்கலைக்கழகத்தின் போவர்மேன் விளையாட்டு அறிவியல் மையத்தில் நடந்த ஆய்வில், மூன்று வெப்ப சிகிச்சை முறைகள் ஆராயப்பட்டன:

* வெந்நீர்த் தொட்டி – உடல் முழுவதும் வெந்நீரில் மூழ்குதல்
* பாரம்பரிய உலர் சௌனா – வெப்பமான, உலர் அறை
* அகச்சிவப்பு சௌனா – அகச்சிவப்பு கதிர்கள் மூலம் வெப்பம்

இவை உடலின் வெப்பநிலை, இதய ஆரோக்கியம், நோய் எதிர்ப்பு சக்தி ஆகியவற்றில் ஏற்படுத்தும் உடனடி மாற்றங்களை ஆராய்ந்தனர். இதில் 20 முதல் 28 வயதுக்குட்பட்ட, உடற்பயிற்சி பழக்கமுள்ள 20 இளம் ஆண்கள் மற்றும் பெண்கள் பங்கேற்றனர்.

Also Read : உங்களுக்கேற்ற சரியான குளியல் சோப்பை தேர்வு செய்வதற்கான ரகசியம்! Your Bath Soap Guide!

வெந்நீரில் மூழ்கும் போது உடலில் என்ன நடக்கிறது?

ஆய்வில், வெந்நீரில் மூழ்கும் போது, உடல் வெப்பநிலை எந்த சௌனாவையும் விட அதிகமாக உயர்ந்தது. இந்த வெப்ப உயர்வு, இரத்த ஓட்டத்தை அதிகரித்து, இரத்த நாளங்கள் ஆரோக்கியமாக செயல்பட உதவுகிறது. உடல் வெப்பநிலை அதிகரிப்பது, இதயத் துடிப்பு, இரத்த அழுத்தம், இதய வெளியீடு ஆகியவற்றிலும் நேரடி மாற்றங்களை ஏற்படுத்தியது.

சௌனாவில், வியர்வை வழியாக உடல் வெப்பத்தை வெளியேற்ற முடியும். ஆனால் வெந்நீரில், வியர்வை ஆவியாகாமல், உடல் வெப்பம் நீண்ட நேரம் அதிகமாகவே இருக்கும். இதனால், உடலில் வலிமையான உடலியல் மாற்றங்கள் நிகழ்கின்றன.

நோய் எதிர்ப்பு சக்திக்கும் வெந்நீர்த் தொட்டிக்கு உறவு

வெந்நீரில் மூழ்கும் போது, நோய் எதிர்ப்பு செயல்பாட்டில் கூடுதல் மாற்றங்கள் ஏற்பட்டன. குறிப்பாக, அழற்சி சைட்டோகைன்கள் எனப்படும் உயிரிமார்க்கர்கள் அதிகரித்தன. இவை நோய் எதிர்ப்பு செல்களின் செயல்பாட்டை ஊக்குவிக்கும் முக்கிய புரதங்கள்.

வெப்ப சிகிச்சை – ஆரோக்கியத்திற்கு ஒரு புதிய வழி

ஆய்வுத் தலைவரும், 20 ஆண்டுகளுக்கும் மேலாக வெப்ப சிகிச்சையை ஆராய்ந்து வருபவருமான பேராசிரியர் கிறிஸ்டோபர் மின்சன், “வெப்ப சிகிச்சை முறைகள், குறிப்பாக வெந்நீரில் மூழ்குதல், மிதமாகவும், முறையாகவும் மேற்கொள்ளப்படும்போது, ஆரோக்கியத்திற்கு பல நன்மை தரும்” என்று கூறுகிறார். உடற்பயிற்சி செய்ய முடியாதவர்களுக்கு, அல்லது விரும்பாதவர்களுக்கு, இது ஒரு நல்ல மாற்று வழியாக இருக்கலாம் என அவர் வலியுறுத்துகிறார்.

Also Read : ஒரு நாளைக்கு எத்தனை முறை முகத்தை கழுவ வேண்டும்? தோல் மருத்துவர்கள் கூறும் அதிர்ச்சியூட்டும் உண்மைகள்!

பாதுகாப்பும் முக்கியம்

வெப்ப சிகிச்சை முறைகள் அனைவருக்கும் ஏற்றதல்ல. உங்கள் உடல் நிலை, மருத்துவ வரலாறு ஆகியவற்றை கருத்தில் கொண்டு, மருத்துவரின் ஆலோசனையுடன் மட்டுமே வெப்ப சிகிச்சை மேற்கொள்ள வேண்டும். மிதமான நடைபயிற்சி, ஜாகிங், அல்லது வலிமை பயிற்சி போலவே, வெப்ப சிகிச்சையும் பொறுப்புடன் செய்ய வேண்டும்.

முடிவில்…

உடலை ஓய்வுபடுத்தும் வெந்நீர்த் தொட்டிகளும், சௌனாக்களும் இரண்டும் நன்மை தரும். ஆனால், உடலியல் ஆய்வுகள், வெந்நீரில் மூழ்கும் அனுபவம் உங்கள் உடல் வெப்பநிலையை அதிகரித்து, இரத்த ஓட்டம் மற்றும் நோய் எதிர்ப்பு சக்தியை மேம்படுத்தும் என்று உறுதியாகக் கூறுகின்றன. உடற்பயிற்சி செய்ய முடியாத நேரங்களில், வெப்ப சிகிச்சை உங்கள் ஆரோக்கிய பயணத்தில் ஒரு பயனுள்ள துணை ஆகும்.

அடுத்த முறையாவது, வெந்நீரில் மூழ்கும் அனுபவத்தை தேர்வு செய்யும் போது, அது உங்கள் உடலுக்கு ஓய்வுக்கு அப்பாலும், நீண்ட கால ஆரோக்கியத்துக்கும் ஒரு சிறந்த முதலீடு என்பதை நினைவில் வையுங்கள். இந்த ஆய்வு அமெரிக்கன் ஜர்னல் ஆஃப் ஃபிசியாலஜி என்ற உலகத் தரமான இதழில் வெளியிடப்பட்டுள்ளது.

Image Source : Getty Images.

Subscribe to our channels on  YouTube  & Telegram &  Tamilnadu  &  Pondicherry