பா.ம.க. தலைவர் டாக்டர். அன்புமணி ராமதாஸ், தி.மு.க. அரசின் தொழில் முதலீடுகள் பொய்யானவை என்பதைக் குறிக்கும் ஆவணப் புத்தகம் ஒன்றை இன்று சென்னையில் வெளியிட்டார். தமிழ்நாட்டின் முன்னேற்றத்துக்காக பா.ம.க. இதுவரை வெளியிட்ட 57 ஆவணங்களின் தொடர்ச்சியாக இந்த அறிக்கை அமைந்துள்ளது.
ஆவணத்தை வெளியிட்டு செய்தியாளர்களிடம் பேசிய டாக்டர். அன்புமணி, “முதலமைச்சர் மு.க.ஸ்டாலின், தொழில் முதலீடுகள் குறித்துத் தொடர்ந்து பொய்யான தகவல்களைக் கூறி வருகிறார். ரூ.11 லட்சத்து 32 ஆயிரம் கோடி முதலீடுகள் வந்துள்ளதாகவும், 34 லட்சம் பேருக்கு வேலை கிடைத்திருப்பதாகவும் முதலமைச்சரும், அமைச்சர்களும் மீண்டும் மீண்டும் சொல்கிறார்கள். இது பொய் என்பதை எங்கள் ஆவணங்கள் நிரூபிக்கின்றன.
📊 முதலீடுகள் குறித்த அதிர்ச்சியூட்டும் புள்ளிவிவரங்கள்:
உலக முதலீட்டாளர்கள் மாநாடு 2024: 631 புரிந்துணர்வு ஒப்பந்தங்களில் 80% செயல்பாட்டுக்கு வந்துள்ளதாகக் கூறுகிறார்கள். இது மிகப்பெரிய பொய். ஆயிரம் கோடிக்கு மேலான ஒப்பந்தங்களில் ஒன்றுகூட செயல்பாட்டுக்கு வரவில்லை.
பயணம் செய்த முதலீடுகள்: முதலமைச்சர் மு.க.ஸ்டாலின் அமெரிக்கா, இங்கிலாந்து, சிங்கப்பூர், துபாய் உள்ளிட்ட 7 நாடுகளுக்குச் சென்றார். இதன் மூலம் ரூ.34,014 கோடி முதலீடு ஈர்க்கப்பட்டதாகவும் 47,650 பேருக்கு வேலை கிடைத்ததாகவும் விளம்பரம் செய்தார்கள். ஆனால், ஒரு பைசா முதலீடு கூட வரவில்லை.
சமீபத்திய ஒப்பந்தங்கள்: 2025 ஏப்ரல் முதல் இன்று வரை 166 ஒப்பந்தங்கள் மூலம் 1.18 லட்சம் கோடி முதலீடுகள் வரும் என்றனர். அதுவும் முழுமையாக வரவில்லை.
நிறுவனங்களின் மறுப்பு: ஃபாக்ஸ்கான் நிறுவன அதிகாரி முதல்வரை மரியாதை நிமித்தமாகச் சந்தித்தபோது, ₹17,000 கோடி முதலீடு ஈர்க்கப்பட்டதாகச் செய்திகள் வெளியாயின. ஆனால், அரைமணி நேரத்தில் அந்த நிறுவனம் முதலீடே செய்யவில்லை என மறுத்தது.
முதலீட்டு விலகல்: 2023-24 இல் ரூ.61,791 கோடிக்கு ஒப்பந்தம் போடப்பட்ட ஹூண்டாய் நிறுவனம், ₹20,000 கோடிக்கு முதலீடு செய்வதாகக் கூறியும், ₹500 கோடி மட்டுமே முதலீடு செய்துள்ளது. கங்கை கொண்டானில் தொழில் தொடங்கக் கையெழுத்திட்ட நிறுவனம் சில மாதங்களில் ஆந்திராவுக்குச் சென்றது ஏன்?
💰 ஊழல், கமிஷன் மற்றும் புறக்கணிப்பு:
சுந்தர் பிச்சை : கூகுள் நிறுவனத்தின் தலைமைச் செயல் அதிகாரி சுந்தர் பிச்சை தமிழராக இருந்தும், கூகுள் நிறுவனம் தமிழ்நாட்டில் முதலீடு செய்யாமல் ஆந்திராவுக்குச் சென்றது ஏன்? இதற்குக் ‘கரப்ஷன், கமிஷன், கலெக்ஷன்’ மட்டுமே காரணம்.
மத்திய அரசின் பட்டியல்: இந்தியாவில் தொழில் தொடங்க உகந்த மாநிலங்கள் குறித்த மத்திய அரசின் பட்டியலில் 17 மாநிலங்கள் இடம்பெற்றன. ஆனால், தமிழகத்தின் பெயரே அதில் இல்லை. இது தி.மு.க. அரசுக்கு வெட்கக்கேடு இல்லையா? தொழில் தொடங்க மத்திய அரசு முன்வைத்த 30 சீர்திருத்தங்களையும் தமிழ்நாடு பின்பற்றவில்லை.
உள்ளூர் வேலைவாய்ப்பு: தனியார் நிறுவனங்களில் 75% வேலைவாய்ப்பை உள்ளூர் இளைஞர்களுக்கு வழங்கும் சட்டம் கொண்டு வருவோம் என்று வாக்குறுதி அளித்தனர். இன்னும் நான்கு மாதங்களே ஆட்சியில் இருக்கும் நிலையில், இன்னமும் அந்தச் சட்டத்தை அமல்படுத்தவில்லை.
முதலமைச்சர் மு.க. ஸ்டாலின் தினம் தினம் பொய்களை கூறி வருகிறார். கேள்வி கேட்டால் இவர்களிடம் பதில் இல்லை. அ.தி.மு.க. ஆட்சிக் காலத்தில் முதலீடுகள் குறித்துப் பொய் சொல்லவில்லை என்பதையும் அவர் சுட்டிக்காட்டினார். முதலீடுகள் ஆந்திரா, தெலங்கானாவுக்கு மாறிச் செல்வதைத் தடுக்க, முதலமைச்சர் உடனடியாக நடவடிக்கை எடுக்க வேண்டும் எனவும் அன்புமணி ராமதாஸ் வலியுறுத்தினார்.
Subscribe to our channels on YouTube & Telegram & 
Tamilnadu & Pondicherry