பொது வேலைநிறுத்தம்: அமைதியாக இருந்த மத்திய அரசு! ஆதரித்த கேரள அரசு… ஆனால் தமிழ்நாடு அரசு மட்டும் கோபமானது ஏன்? ஐபெட்டோ கேள்வி!

தொழிலாளர் வர்க்கத்தின் எழுச்சி! நமது உரிமைகளுக்காக, இந்த நாட்டின் முதுகெலும்பாகிய தொழிலாளர் தோழர்கள் இன்று தேசம் தழுவிய பொது வேலைநிறுத்தப் போராட்டத்தை வெற்றிகரமாக நடத்தியுள்ளனர். மத்திய அரசின் தொழிலாளர் விரோதக் கொள்கைகள், தனியார்மயமாக்கல் வெறி, மற்றும் மாநில உரிமைகளைப் பறிக்கும் நடவடிக்கைகள் ஆகியவற்றுக்கு எதிராக, தொழிற்சங்கங்கள் ஓங்கி ஒலித்த குரல், ஆட்சியாளர்களுக்கு ஒரு தெளிவான எச்சரிக்கை.

ஆனால், இந்தப் போராட்டக் களத்தில், தமிழ்நாடு அரசின் தலைமைச் செயலாளர் எடுத்திருக்கும் நிலைப்பாடு மிகுந்த கண்டனத்திற்குரியது. கேரளம் உள்ளிட்ட பல மாநில அரசுகள் போராட்டத்திற்கு ஆதரவாகவோ, குறைந்தபட்சம் நடுநிலையாகவோ இருந்தபோது, தமிழ்நாடு அரசு மட்டும் இவ்வளவு ஆவேசத்துடன் ‘வேலை இல்லை, ஊதியம் இல்லை’ என்ற அறிவிப்பையும், துறைரீதியான நடவடிக்கைகளையும் ஏன் எடுக்க வேண்டும்? இது மத்திய அரசின் ஆதிக்க உணர்வுகளோடு ஒத்துப் போவதாகவே தோன்றுகிறது.

அகில இந்திய அளவிலான பொது வேலைநிறுத்தம் மாபெரும் வெற்றி!

இதுகுறித்து அகில இந்திய தொடக்கப் பள்ளி ஆசிரியர் கூட்டமைப்பின் (AIFETO – ஐபெட்டோ) தேசியச் செயலாளரும், தமிழக ஆசிரியர் கூட்டணியின் மூத்த தலைவருமான வா. அண்ணாமலை வெளியிட்டுள்ள அறிக்கையில், இன்று (09.07.2025) நாடு தழுவிய பொது வேலைநிறுத்தம் பெரும் வெற்றி பெற்றுள்ளது.

மத்திய அரசின் தொழிலாளர் விரோதப் போக்கினைக் கைவிட வலியுறுத்தியும், அனைத்துப் பொதுத்துறை நிறுவனங்களையும் தனியார்மயமாக்கும் மக்கள் விரோதக் கொள்கைக்கு எதிராகவும் மத்திய தொழிற்சங்கங்கள் இந்த வேலைநிறுத்தத்தை அறிவித்து நடத்தின. இதில் அனைத்துக் கட்சிகளின் தொழிற்சங்கங்களும், பெரும்பாலான மாநிலங்களும் இணைந்து களத்தில் நின்று போராடினார்கள். இது தொழிலாளர் வர்க்கத்தின் ஒற்றுமைக்கும், போராட்ட உணர்வுக்கும் ஒரு சான்றாகும்.

தமிழ்நாடு அரசின் ஆவேசம் ஏன்? – ஓர் அரசியல் கேள்வி!

மத்திய அரசின் மக்கள் விரோதக் கொள்கைகளுக்கு எதிராக இந்தியா முழுவதும் தொழிற்சங்கங்கள் ஒன்றுதிரண்டு போராடிய நிலையில், தமிழ்நாடு அரசு மட்டும் இவ்வளவு ஆவேசமும், போராடுபவர்களுக்கு எதிரான தண்டனை அறிவிப்புகளும் வெளியிட வேண்டிய அவசியம்தான் என்ன?

* ஒன்றிய அரசு என்று நாம் அழைப்பதால், ஒன்றிய அரசின் ஆதிக்க சக்திகளோடு ஒன்றிணைந்து அறிக்கை விடுகிறார்களோ?
* கேரளம் உள்ளிட்ட மத்திய அரசின் ஆதிக்க உணர்வுகளுக்கு எதிரான மாநில அரசுகளுக்கு இல்லாத கோபம் தமிழ்நாடு அரசுக்கு மட்டும் ஏன் வர வேண்டும்?

மாநில உரிமைகளுக்காகப் பேசும் ஒரு மாநில அரசு, தொழிலாளர் உரிமைகளை நசுக்குவதில் மத்திய அரசுடன் கைகோர்ப்பது போன்ற தோற்றத்தை இது ஏற்படுத்துகிறது.

முக்கிய 17 அம்சக் கோரிக்கைகள் – தொழிலாளர் உரிமைகளின் குரல்!

தொழிற்சங்கங்கள் முன்வைத்த 17 அம்சக் கோரிக்கைகள், தொழிலாளர்களின் நியாயமான கோரிக்கைகளாகும். 100 ஆண்டுகளாகப் போராடிப் பெற்ற தொழிலாளர் உரிமைகளை, நான்கு சட்டத் தொகுப்புகளின் மூலமாக மத்திய அரசு பறித்துள்ளது. குறிப்பாக:

* எட்டு மணிநேர வேலை நேரத்தினை 10 மணி நேரம், 12 மணி நேரம் என கார்ப்பரேட்டுகளின் முடிவுகளுக்கு ஆதரவாக, கார்ப்பரேட்டுகளின் கட்டுப்பாட்டில் தொழிலாளர்களின் நலன்களை மத்திய அரசு ஒப்படைத்துள்ளதற்கு கடும் கண்டனம்.

தனியார்மயமாக்கல் வெறி – தேசத்தின் சொத்துக்கள் சூறைபோகுமா?

அஞ்சல் துறை, தொலைத்தொடர்பு, ரயில்வே, மின்சாரம், நிலக்கரி, சுரங்கங்கள், துறைமுகங்கள், விமான நிலையங்கள் மற்றும் சாலைப் போக்குவரத்து உள்ளிட்ட பல்வேறு பொதுத்துறை நிறுவனங்களைத் தனியார்மயமாக்கும் நடவடிக்கைகளில் மத்திய அரசு ஈடுபட்டு வருகிறது. இது தேசத்தின் சொத்துக்களை கார்ப்பரேட்டுகளுக்குத் தாரைவார்க்கும் மக்கள் விரோத நடவடிக்கையாகும்.

மாநில உரிமைகள் பறிப்பு & கல்விக்கு எதிரான சதி!

மாநில அரசின் உரிமைகளைப் பறித்து, மத்திய அரசின் கட்டுப்பாட்டிற்குள் வைத்துக்கொண்டு, அவர்களின் எண்ணப்படி ஆட்டிப்படைக்க மத்திய ஆட்சியாளர்கள் முனைகிறார்கள்.

* மும்மொழித் திட்டத்தினை அமல்படுத்துகிறார்கள்.
* தேசியக் கல்விக் கொள்கை- 2020ஐ அனைத்து மாநிலங்களும் ஏற்றுக்கொள்ள வேண்டுமென ஆணையிட்டு வருகிறார்கள்.
* ஏற்காத மாநிலங்களுக்கு கல்விக்கான நிதியினை நிறுத்தி வைத்துள்ளார்கள்.

இது மாநிலங்களின் சுயாட்சி உரிமைகளைப் பறிக்கும் செயல். “பிள்ளைகள் எந்தப் பள்ளியில் படிக்க வேண்டும் என்பதைப் பெற்றோர்தான் முடிவு செய்ய வேண்டும். மாநில அரசு அவர்களுக்கு வழிகாட்டும் கொள்கை விதிகளை வகுக்க வேண்டும். அதில் மத்திய அரசு தலையிடக் கூடாது,” என கோரிக்கை வைக்கப்பட்டுள்ளது.

அடிப்படை உரிமைகளுக்கான போராட்டம்!

“சம வேலைக்கு, சம ஊதியம்” என்ற அடிப்படை உரிமையினைத் தொழிற்சங்கங்கள் வலியுறுத்துகின்றன. இதைவிட முக்கியமாக, ஒருங்கிணைந்த ஓய்வூதியத் திட்டத்தைக் கைவிட்டு, பழைய ஓய்வூதியத் திட்டத்தை இந்தியா முழுவதும் அமல்படுத்த வேண்டும் என்ற பிரதான கோரிக்கையினை முன்வைத்துள்ளன.

இதர முக்கிய கோரிக்கைகள்:

* எட்டாவது ஊதியக்குழு அறிக்கையை உடன் வெளியிட வேண்டும்.
* கல்விக்கான நிதி ஒதுக்கீட்டை மொத்த உள்நாட்டு உற்பத்தியில் (GDP) 6% ஒதுக்க வேண்டும்.
* லட்சக்கணக்கான காலிப் பணியிடங்களை உடன் நிரப்ப வேண்டும்.
* ஒப்பந்த அடிப்படை நியமனங்களை அறவே கைவிட வேண்டும்.
* நீட் தேர்வினை ரத்து செய்ய வேண்டும்.
* நியமனத் தேர்வினை ரத்து செய்ய வேண்டும்.

போராட்டத்தில் இணைந்த பல்வேறு சக்திகள்!

இந்த பொது வேலைநிறுத்தப் போராட்டத்திற்குப் பல்வேறு மாநிலங்கள் இணைந்து குரல் கொடுத்தன, கலந்து கொண்டன. வாக்குறுதிகளை நிறைவேற்றச் சொல்லி இந்தியா முழுவதும் ஏ.ஐ.டி.யு.சி., சி.ஐ.டி.யு., ஐ.என்.டி.யு.சி., AIFETO, AIFUCTO, STFI, தொ.மு.ச., இந்திய மாணவர் சங்கம், ஜாக்டோ-ஜியோவில் அங்கம் வகிக்கும் சங்கங்கள் எல்லாம் இணைந்து போராடினார்கள். வேலைநிறுத்தத்தில் வருமான வரித்துறையைச் சார்ந்த அலுவலர்கள், ஊழியர்கள் பெருமளவில் கலந்து கொண்டது குறிப்பிடத்தக்கது.

தமிழ்நாடு அரசின் இரட்டை வேடம் – தொழிலாளர் கோபம்!

தமிழ்நாடு அரசின் தலைமைச் செயலாளர் 8-ஆம் தேதி ஆங்கில மொழியில் வெளியிட்டுள்ள அறிவிப்பில், வேலைநிறுத்தத்தில் கலந்து கொள்பவர்களுக்கு “NO WORK; NO PAY” என்று அறிவித்துள்ளார்கள். இது ஒரு நடைமுறை விதிதான் என்றாலும், இன்று தற்செயல் விடுப்பு எடுப்பதற்குக்கூட அனுமதி இல்லை என்று தெரிவித்துள்ளார். அது மட்டுமல்லாமல், வேலைநிறுத்தத்தில் ஈடுபடுபவர்கள் மீது துறைரீதியான நடவடிக்கையும் மேற்கொள்ளப்படும் என்றும் எச்சரிக்கை செய்துள்ளார்.

“பா.ஜ.க. அரசின் தொழிலாளர் விரோதக் கொள்கையையும், தமிழ்நாடு அரசின் இந்த ஆவேச நடவடிக்கையையும் பார்த்தால், ஆதிக்க சக்தி உணர்வில் எங்களுக்கு ஒன்றும் வேறுபாடு இருப்பதாகத் தெரியவில்லை. மத்திய அரசுக்கு எதிரான தொழிலாளர்களின் போர்க்குண உணர்வு, வெறுப்புணர்வு, தமிழ்நாடு அரசு மீதும் ஏற்படுவதற்கு தமிழ்நாடு தலைமைச் செயலாளர் அவர்களின் அறிக்கை வாய்ப்பளித்துள்ளது என்றே கருதுகிறோம்.

போராட்டம் தொடரும்! வரலாறு துணை நிற்கும்!

இந்தியத் திருநாட்டில் இன்று 25 கோடி பேர் வேலைநிறுத்தத்தில் பங்கேற்றுள்ளனர். ஆதிக்க சக்திகளுக்கு எதிராகத் தொழிற்சங்கங்களின் போராட்ட உணர்வு கொந்தளித்துக் கொண்டே இருக்கும். கோரிக்கைகளை வென்றெடுக்கும் வரை தொடர்ந்து களத்தில் நிற்போம். “தொழிற்சங்கங்களின் போராட்டங்கள் எப்போதும் தோற்றதில்லை! தொழிற்சங்கங்கள் தோற்றதாக வரலாறே இல்லை!” என்ற முழக்கத்துடன், அகில இந்திய அளவிலான வேலைநிறுத்தப் போராட்டம் மாபெரும் வெற்றி பெற்றுள்ளது.

தமிழ்நாடு முழுவதும் மாவட்டத் தலைநகரங்களிலும், வட்டாரத் தலைநகரங்களிலும் வேலைநிறுத்த ஆர்ப்பாட்டத்தில் ஆசிரியர்கள், அரசு ஊழியர்கள், அலுவலர்கள், பணியாளர்கள், தொழிலாளர்கள் ஆர்ப்பரித்துக் கலந்து கொண்டு மத்திய அரசுக்கு எதிரான உணர்வுகளை வெளிப்படுத்தியுள்ளார்கள். கோரிக்கைகளை வென்றெடுக்கும் வரை தொழிற்சங்கங்களின் போராட்டம் தொடரட்டும்!” இவ்வாறு அவர் கூறியுள்ளார்.

Contact AIFETO Annamalai @ 94442 12060 / 9962222314. annamalaiaifeto@gmail.com

Subscribe to our channels on  YouTube  & Telegram &  Tamilnadu  &  Pondicherry