இனி முகவரி தேடி அலைய வேண்டாம்! வருகிறது ‘டிஜிபின்’… தபால் துறை தொடங்கி வைத்த புதிய புரட்சி!

நமது இந்தியத் தபால் துறை, 1972 ஆம் ஆண்டு சுதந்திர தினத்தன்று அறிமுகப்படுத்தப்பட்டது. கடந்த ஐந்து தசாப்தங்களுக்கும் மேலாக நமது முகவரிகளின் பிரிக்க முடியாத பகுதியாக இருந்த ‘பின்கோடு’க்கு (PIN code) இப்போது ஒரு டிஜிட்டல் மாற்றீட்டைக் கொண்டு வந்துள்ளது தபால் துறை. ‘டிஜிபின்’ (DIGIPIN) என்ற புதிய டிஜிட்டல் முகவரி அமைப்பு, இனி உங்கள் முகவரியை மிகத் துல்லியமாக அடையாளம் காட்டும் ஒரு அற்புதமான வசதியாகும்.

Also Read : தேசிய தபால் தினம்! மொழி அறிவை மேம்படுத்தி, மன அழுத்தத்தைக் குறைக்கும் போஸ்ட் கார்டு!

டிஜிபின் என்றால் என்ன? இது பின்கோடை விட ஏன் சிறந்தது?

பொதுவாக, நாம் பயன்படுத்தும் ஆறு இலக்கப் பின்கோடு ஒரு பெரிய பகுதியை மட்டுமே குறிக்கும். ஆனால் இந்த புதிய ‘டிஜிபின்’, பத்து இலக்க எழுத்து மற்றும் எண் கலந்த குறியீடாகும். இது உங்கள் வீடு அல்லது வணிகத்தின் சரியான இடத்தைக் கிட்டத்தட்ட நான்கு மீட்டர் சுற்றளவுக்குள் துல்லியமாகக் காட்டும்.

அதாவது, “அந்தத் தெருவில் அந்த வீடு” என்று தேடாமல், “சரியாக இந்த இடம்” என்று அடையாளம் காட்டும். உதாரணமாக, எழும்பூர் மெட்ரோ ரயில் நிலையத்தின் டிஜிபின் ‘4T3-8L8-FT75’ என்று இருக்கும். இந்தத் துல்லியம், தபால் சேவைகளுக்கு மட்டுமல்லாமல், பல அவசரச் சேவைகளுக்கும் பேருதவியாக இருக்கும்.

எங்கு பயன்படும்? எப்படிப் பெறலாம்?

‘டிஜிபின்’ குறியீட்டைப் பெறுவதற்கு இந்திய தபால் துறையின் பிரத்யேக வலைதளம் உள்ளது. இந்த இணையதளத்தில் உங்கள் முகவரியை உள்ளிட்டு அதற்கான டிஜிபின் குறியீட்டைப் பெறலாம். இந்த டிஜிட்டல் பின் முகவரி அமைப்பு, அவசர மருத்துவச் சேவை (ஆம்புலன்ஸ்), தீயணைப்புத் துறை போன்ற அவசரச் சேவைகள் சரியான இடத்திற்கு உடனடியாகச் செல்ல உதவும்.

மேலும், இந்த புதிய அமைப்பு ஆஃப்லைனிலும் (இணைய இணைப்பு இல்லாமலும்) பயன்படுத்தும் வகையில் வடிவமைக்கப்பட்டுள்ளதால், கிராமப்புறங்கள், தொலைதூரப் பகுதிகள் மற்றும் அடிப்படை வசதிகள் குறைவாக உள்ள இடங்களில் இது மிகவும் பயனுள்ளதாக இருக்கும் என்று அதிகாரிகள் தெரிவிக்கின்றனர்.

யார் உருவாக்கியது? யாருக்குப் பயன்?

ஐஐடி-ஹைதராபாத் மற்றும் இஸ்ரோவின் தேசிய ரிமோட் சென்சிங் சென்டர் ஆகியவற்றுடன் இணைந்து இந்த டிஜிட்டல் முகவரி அமைப்பு உருவாக்கப்பட்டுள்ளது. “இது ‘முகவரி ஒரு சேவை’ (Address-as-a-Service – AaaS) என்ற தபால் துறையின் நோக்கத்திற்கு ஒரு முக்கியத் தூணாகும்.

இது பயனர்கள், அரசு நிறுவனங்கள் மற்றும் தனியார் துறை அமைப்புகளுக்கு இடையே பாதுகாப்பான மற்றும் திறமையான தொடர்பு சேவைகளை வழங்கும்” என்று தபால் துறை தெரிவித்துள்ளது. இந்திய தபால் துறைப் பணியாளர்கள் கடிதங்கள் மற்றும் பிறப் பொருட்களைச் சரியான இடத்திற்கு கொண்டு செல்ல உதவுவதோடு மட்டுமல்லாமல், வாடிக்கையாளர்களின் வீட்டிற்கே நேரடியாக டெலிவரி செய்யும் இ-காமர்ஸ் நிறுவனங்களுக்கும் இது பெரும் உதவியாக இருக்கும்.

Also Read : பூமி உருவான கதை: 460 கோடி ஆண்டுப் பயணம் – விண்கற்கள் முதல் மனிதர்கள் வரை!

கருத்துகளும், கவலைகளும்!

இது ஒரு ‘ஓப்பன் சோர்ஸ்’ (Open-Source) அமைப்பு என்பதால், பொதுமக்கள், மென்பொருள் உருவாக்குநர்கள், நிறுவனங்கள் மற்றும் பிற பங்குதாரர்கள் இந்த போர்ட்டல்களைப் பார்வையிட்டு, தரவு துல்லியம் மற்றும் பயன்பாடு குறித்து தங்கள் கருத்துக்களைச் சமர்ப்பித்து இந்த அமைப்பை மேம்படுத்த உதவ வேண்டும் என்று தபால் துறை கேட்டுக் கொண்டுள்ளது.

“டிஜிபின் எந்தத் தனிப்பட்ட தரவையும் சேமிப்பதில்லை, புவி நிலை குறியீடுகள் (geographic coordinates) அடிப்படையில் ஒரு எழுத்து-எண் குறியீட்டை மட்டுமே வழங்குகிறது, இது தனியுரிமையை உறுதி செய்கிறது” என்று இந்திய தபால் துறை விளக்கமளித்துள்ளது.

கிராமப்புறங்கள் மற்றும் தொலைதூரப் பகுதிகளுக்கு டிஜிபின் உதவியாக இருக்கும். ஆனால் நகரங்களுக்கு, இது கூகுள் மேப்ஸ் போன்ற மற்றொரு இடம் கண்டுபிடிக்கும் கருவிதான். மேலும் இது பாரம்பரியப் பின்கோடுக்கு மாற்றாக வராது என்று கருத்தும் நிலவுகிறது.

உங்கள் DIGIPIN-ஐ தெரிந்துகொள்ள, கீழேயுள்ள இணையதளத்தை பார்வையிடுங்கள்:
👉 https://dac.indiapost.gov.in/mydigipin/home.

Subscribe to our channels on  YouTube  & Telegram &  Tamilnadu  &  Pondicherry