இந்த ஆண்டு நீட் தேர்வில் அரசுப் பள்ளி மாணவர்கள் சிறந்து விளங்கியதன் மூலம், மருத்துவக் கல்லூரிகளில் அவர்களின் பிரதிநிதித்துவம் கணிசமாக அதிகரித்துள்ளது. எடப்பாடி பழனிசாமியில் முயற்சியால் கொண்டுவரப்பட்ட 7.5 சதவிகித இடஒதுக்கீட்டால் குறிப்பிடத்தக்க சாதனையாக இது நிகழ்த்தப்பட்டுள்ளது.
நீட் தேர்வு அமலான பிறகு அரசுப் பள்ளி மாணவர்கள் மருத்துவம் படிப்பது கனவாக இருந்த நிலையில், நீட் தேர்வில் தேர்ச்சி பெறும் அரசு பள்ளி மாணவர்களுக்கு, மருத்துவ மாணவர் சேர்க்கையில், உள் இடஒதுக்கீடு வழங்குவது தொடர்பாக ஆலோசித்து, அரசுக்கு அறிக்கை அளிப்பதற்காக ஓய்வுபெற்ற நீதிபதி கலையரசன் தலைமையில் 2020 மார்ச் 21-ம் தேதி குழு அமைக்கப்பட்டது. அந்தக்குழு அளித்த அறிக்கையின் அடிப்படையில் அரசுப் பள்ளி மாணவர்களுக்கு 7.5 % இட ஒதுக்கீடு வழங்குவதற்கு அப்போதைய முதலமைச்சர் எடப்பாடி பழனிசாமி தலைமையிலான அமைச்சரவை ஒப்புதல் அளித்தது.
இதையடுத்து, மருத்துவப் படிப்பில் அரசுப் பள்ளி மாணவர்களுக்கு 7.5% உள்ஒதுக்கீடு வழங்கப்படும் என தமிழக அரசு அரசாணை வெளியிட்டது. ஆளுநரும் அதற்கு ஒப்புதல் அளித்தார். அதன்படி அரசுப் பள்ளி மாணவர்களுக்கு அரசு மருத்துவக் கல்லூரி மற்றும் தனியார் கல்லூரிகளில் இடம் ஒதுக்கப்பட்டது. மேலும், 7.5 சதவீத இட ஒதுக்கீட்டில் தனியார் மருத்துவ கல்லூரிகளில் சேரும் அரசுப் பள்ளி மாணவர்களின் கல்விக் கட்டணத்தை அரசே ஏற்கும் என்றும் முதலமைச்சர் எடப்பாடி பழனிசாமி கூறினார். இதைத்தொடர்ந்து இளங்கலை மருத்துவப்படிப்பில் சேரும் அரசுப் பள்ளி மாணவர்களின் எண்ணிக்கை ஆண்டுக்கு ஆண்டு அதிகரித்து வந்தது.
இந்நிலையில், கோயம்புத்தூரைச் சேர்ந்த செல்வகுமார், தகவல் அறியும் உரிமைச் சட்டத்தின் மூலம் பெற்ற புள்ளி விவரங்களின்படி, அரசுப் பள்ளி மாணவர்களில் 78 பேர் உள் ஒதுக்கீட்டைப் பயன்படுத்தாமல் மருத்துவக் கல்லூரிகளில் சேர்ந்துள்ள தகவல் தெரியவந்துள்ளது. இது மொத்த சேர்க்கையில் 7.5% ஆகும். 2017ம் ஆண்டோடு ஒப்பிடும்போது இது குறிப்பிடத்தக்க முன்னேற்றமாகும்.
இதுமட்டுமல்லாமல், நீட் பயிற்சி வகுப்புகளுக்கு செல்லாமல் மாநில அரசு ஒதுக்கீட்டின் கீழ் 3,248 மாணவர்கள் (அதாவது 49%) மருத்துவப் படிப்புகளில் சேர்ந்துள்ளனர் என்பதும் தெரியவந்துள்ளது. சுகாதாரம் மற்றும் குடும்ப நலத்துறையின் அதிகாரப்பூர்வ ஆவணங்களை மேற்கோள் காட்டி தாக்கல் செய்யப்பட்ட தகவல் அறியும் உரிமை மனுவுக்கு பதிலளிக்கும் வகையில் இந்த தரவு வெளியிடப்பட்டுள்ளது.
மொத்த மருத்துவ இடங்கள்: மாநில மருத்துவ ஒதுக்கீட்டின் கீழ் 8,316.(அரசு மற்றும் சுயநிதி நிறுவனங்கள் உட்பட).
அரசு பள்ளிகளில் இருந்து சேர்க்கை பெற்ற மாணவர்கள்: 7.5% இட ஒதுக்கீடு நீங்கலாக – 78 மாணவர்கள்; 7.5% இட ஒதுக்கீடு – 683 மாணவர்கள்.
கல்வி வாரிய அடிப்படையில் மாணவர் சேர்க்கை:
- தமிழ்நாடு மாநில வாரியம்: 4,140 மாணவர்கள்
- சிபிஎஸ்இ: 4,030 மாணவர்கள்
- ஐசிஎஸ்இ: 81 மாணவர்கள்
- பிற வாரியங்கள்: 39 மாணவர்கள்
நீட் பயிற்சி:
- நீட் பயிற்சி பெற்ற மாணவர்கள்: 3,305 மாணவர்கள்
- நீட் பயிற்சி இல்லாத மாணவர்கள்: 3,248 மாணவர்கள்
- நீட் தேர்வுடன் கூடிய மருத்துவ இடங்களுக்கான விண்ணப்பங்கள்: 11,008 மாணவர்கள்
- நீட் பயிற்சி இல்லாமல் மருத்துவ இடங்களுக்கு விண்ணப்பங்கள்: 17,822 மாணவர்கள்
இந்த புள்ளிவிவரங்கள் போட்டித் தேர்வுகளில் அரசுப் பள்ளி மாணவர்களின் அதிகரித்து வரும் வெற்றியை எடுத்துக்காட்டுகின்றன. மருத்துவத் துறையில் உயர்கல்வியை அணுகுவதற்கான தடைகளைத் தாண்டி அரசுப் பள்ளி மாணவர்களின் வளர்ந்து வரும் போக்கை இந்தத் தரவு பிரதிபலிக்கிறது.
Subscribe to our channels on YouTube & Telegram & 
Tamilnadu & Pondicherry